ضحْك الْآلِهَة (الجزء الأول) .

الكاتب : مهدي اليداوي 

لفيقة لي غانفيق ماكانتش هي هاديك ، شي حاجة كانت ماشي تال تما

آو ؟ فقت لراسي بلا ماتفيقني لواليدة ،تا كيدرت ليها ؟ هادي آآآول مرة من نهار تزاديت فداك النهار المشؤوم مافقت لراسي، كنت نقد نفكر بلي نقدر شي نهار نطير و تولي عندي قوة التنين صلايفر ولكن باش نفيق لراسي بلا مايفيقني شي حد را مايمكنش ،و إلى جينا نحسبوها بورقا و ستيلو را مايمكنش .

حاولت نستوعبها ، درت بحال يلا ماوقع والو ،و مشيت باش غانغسل وجهي ...حليت الروبيني، حنيت راسي لجيهتو، و عمرت حفنة د الما فيدي ،و سرفقت بيها وجهي باش عيني يتحلوا... و طلعت وجهي ببطأ شديد لجيهة لمرايا باش نشوف راسي ، فإذا بي أصدم من هول المنضر ، ياربآآاه شهادشي تاني ؟ لا لا آربي لا رامايمكنش هادشي ،را غاكانحلم واقيلا ...آآآو تا شي حبوبة ماكاينة فوجهي? مايمكنش ...

فلول فقت لراسي و قلنا هانيا و دوزناها بجغما دلما ، و لكن باش نلقا وجهي ماناضت فيه تا شي حبوبة را لحماق هادا ، مولف كل صباح خاصني نبدا نطرطق فيه ، شنو دابا ، غانشومي زعما ؟

وآآآع على صباح ، البيت لي عمرني جمعتو رشقاتلي عليه نجمعو داك الصباح ، تامن ناموسيتي قاديتها ، أكبر المتفائلين ماكانش يتوقع بلي شي نهار غانقاد بيتي ، و لكن أنا مور مافقت لراسي و لقيت وجهي صافي ، را مابقات تاحاجا مازال لي تقد تصدمني فهاد الحياة ...

درت صاكي فكتافي وشديتها صمطا لمدراستي ، اللي داز من قدامي كانقوليه صباح لخير ، كاينين ناس لي تصدموا فاش قلتهالهم يسحابوني غا مبوق ، حتا من المشاش لي فالزنقة استغربوا حيت ماخلعتهومش ، عشراني لي ديما كانشد معاهم الستون ، لي ديما كانريح معاهم فاللخر د القسم ، و لي لمناتيف دالدنيا و الدين دوزتها معاهم ، مارشقاتش لي عليهم داك الصباح ، واخا انا عنصر خطير و من ركائز الكليكا ماقدرتش نبقا واقف معاهم ، حيت كانهضرو غا على كورة و كيم كارديشان و إلى ماكانوش هاد الجوج كانهدروا على لبلان لي غانديرو للأستاد ، و أنا كرهت راسي فاش وقفت وسطهم ، اعتادرت ليهم و بعدت مافهموا والو مساكن ، كانو عوالين عليا نجيب ليهم شي بلان جديد ساعا خذلتهم ، و لكن تاهوما عذروني حيت يسحابليهم راني كانحب ولا شي حاجة هاكا ... وقفت شوية بوحدي باش نعرف شنو لي كيوقعلي ، هادشي را ماشي طبيعي ، بديت كانتخلع ، القباحة لي فيا غبرات بين يوم و ليلة ، وليت حنين بلا قياس ، مابقيتش كانوقف مخرج سدري ، وليت كانوقف لاوي ، تا من هضرتي تبدلات ، مابقيتش كانخصر الهضرة ، حلقي رقاق و ضحكتي ولات كاتخري بالضحك ، شهااادشي آربي لي كيوقعلي , لا آسيدي ربي را مابغيتش ندير عقلي دابا ...

الطاولة اللخرة لي من التحضيري وانا كانجلس فيها مامشيتش ليها و لأول مرة فحياتي ، و جلست فاللولة ، ضرت و بديت كانشوف فيها ، واخا هي جماد حسيت بيها مافهمات والو ، حسيت بيها حزنات على فراقي ، سمعتها كاتقولي آجي عندي آ مهدي آجي علاش بدلتيني علاش ?

كانت واحد الرغبة شديدة بزاف لي ماقدرتش نقاومها كاتملكني باش مانبدلش لبلاصة ، و نبقا منتابه الحصة كاملة مع الاستاد ، و ماشي مرة ماشي جوح نضت للسبورة ، التلامذ و الاستاذ داخو ، المجتهدة د القسم بقات غا حالة فمها ، الدراري صحابي كانشوفيهم كلهم كيتأملوا فيا و فوق راسهم علامة استفهام كبيرة ، مذا يقع يا إلاهي ? أ هي علامة من علامات الساعة ?

صونات ساعتي خرجت طاير نيشان للدار ، سديت عليا و بغيت نفهم شهادشي كيوقع ، را ماشي الضحك ، علاش دابا الراجا لاعبا و أنا ماباغيش نوض نتفرج علاش ? علاش حوايجي مابقاوش عاجبيني ? علاش قبيلا فكرت نصبغ شعري علاش ? علاش ماشفت فتا شي بنت علاش ? ...

خليت هاد التساؤلات كاتسركل فراسي و دزت نعست ، و كلي أمل أنني نفيق عادي كيما كنت و كيفما كيعرفني كلشي .

-بنفس الطريقة لي فقت بيها فالنهار اللول غانفيق فالتاني ، الحبوب تا هو ماكاينش و للله الحمد ... حكيت سناني مشطت شعري و قبل ماغانجي نبول ، المدينة كاملة غادي تزعزع بسباب التغويتة لي درت و لي موراها أغمي علي لساعااات ، العضو ديالي اختفى ، قلاوية مشااو زبي طاار وليت بنت ، أصابتني اللعنة ملللللخر ، آاااناري شهاد المصييبا را غا كانحلم وقيلا , لا مايمكنش ، و الله تا كنت عارف بلي دوك النكت لي كانخرج على سيدي ربي غايخرجوا فيا شي موصيبا ، آسيدي ربي شهادشي خرجتي فيا ، را والله انا تا مسلم را ما مولحيد ما والو... را واخا كانقول عليك ماكاينش را والله نتا تا عندي عزيز ، هنينا من هاد الضحك و رد لي قلاوية ، دير فيا لي بغيت غا ردني بعدا كيما كنت ...
البكا ديالي و هاد الرغيب لي كنت كانرغب بيه سيدي ربي مانفع بوالو ,
شغاندير دابا مع هاد لفضيحة ?

نقول هادشي لواليدييا ؟ لا لا لا هوما را على سبة تقد تجيهم شي أزمة قلبيية ...
نقول هادشي لعشراني ؟ لا لا لا غايشبعوا عليا غا ضحك ...
نقول هادشي لزينب ؟ لا لا لا آآآو ، انا بسسسسسيف باش تصاحبت معاها و نقولها ليها ...شغاندير آسيدي ربييييي ؟؟ الحل بانلي هو ندير بحال يلا ماوقع والو ، ولكن إلى خرجو لي لبزازل و طرمتي وساعت باش غانبرر هادشي ؟؟

يتبع...